ಪ್ರಭು ಯೇಸು ಕ್ರಿಸ್ತರಲ್ಲಿ ನನ್ನ ಪ್ರಿಯ ಗುರುಗಳೇ, ಕನ್ಯಾಭಗಿನೀಯರೇ ಮತ್ತು ಭಕ್ತಜನರೇ,
ಗುಲ್ಬರ್ಗಾ ಧರ್ಮಕ್ಷೇತ್ರ ಇತಿಹಾಸದಲ್ಲಿ ಆಗಸ್ಟ್ 18, 2005 ಒಂದು ಸ್ಮರಣೀಯ ದಿನ. ಅಂದು ನಮ್ಮ ಧರ್ಮಕ್ಷೇತ್ರವನ್ನು ಅಧಿಕೃತವಾಗಿ ಪ್ರಾರಂಭಿಸಲಾಯಿತು. ಅದೇ ದಿನ ನನಗೆ ನೂತನವಾಗಿ ರಚಿಸಿದ ಧರ್ಮಕ್ಷೇತ್ರಕ್ಕೆ ಧರ್ಮಾಧ್ಯಕ್ಷರನ್ನಾಗಿ ಆಭಿಷೇಕಿಸಿ, ನನ್ನ ಯಾಜಕ ಜೀವನದ ಪಯಣವನ್ನು ಈ ಧರ್ಮಕ್ಷೇತ್ರದ ಸೇವೆಗೆ ಅರ್ಪಿಸುವ ಅನನ್ಯ ಕರ್ತವ್ಯವನ್ನು ದೇವರು ನನಗೆ ವಹಿಸಿದರು. ಇಂದಿಗೆ ಇಪ್ಪತ್ತು ವರ್ಷಗಳು ಸಂಪೂರ್ಣಗೊಳ್ಳುತ್ತವೆ. ಈ ಕ್ಷಣದಲ್ಲಿ ನಾನು ಹಿಂದಿನ ದಿನಗಳನ್ನು ಅವಲೋಕಿಸಿ ನೋಡಿದಾಗ ನನ್ನ ಹೃದಯವು ದೇವರ ಮಹಾದಾನಕ್ಕಾಗಿ ಕೃತಜ್ಞತೆಯಿಂದ ತುಂಬಿದೆ. “ದೇವಾರಾತ್ಮನ ಬಲದಿಂದ” ಎಂಬ ವಾಕ್ಯವು ನನ್ನ ಧರ್ಮಾಧ್ಯಕ್ಷರ ಸೇವಾ ಜೀವನದ ಧೈಯ ವಾಕ್ಯವಾಗಿದೆ. ಪರಿಶುದ್ಧಾತ್ಮನ ಪ್ರೇರಣೆಯಿಲ್ಲದೆ ಯಾವ ಕೆಲಸವೂ ಸಾಧ್ಯವಾಗಿರಲಿಲ್ಲ. ಮೂಲಸೌಕರ್ಯ ನಿರ್ಮಾಣ, ವ್ಯವಸ್ಥೆಗಳ ಸ್ಥಾಪನೆ, ಕೇಂದ್ರಗಳ ಸಂಘಟನೆ, ತರಬೇತಿ ಕೇಂದ್ರಗಳ ಸ್ಥಾಪನೆ ಇವೆಲ್ಲವುಗಳ ಹಿಂದೆ ದೇವರ ಆತ್ಮನೇ ಕಾರ್ಯನಿರ್ವಹಿಸಿದ್ದಾನೆಂದು ನಾನು ದೃಢವಾಗಿ ನಂಬುತ್ತೇನೆ. ನಾನು ಎಂದಿಗೂ ದೊಡ್ಡ ತೊಂದರೆಗಳನ್ನು ಎದುರಿಸಲಿಲ್ಲ; ಇದಕ್ಕೆ ಕಾರಣವೆಂದರೆ ದೈವಾನುಗ್ರಹ, ನಿಮ್ಮ ಪ್ರೀತಿ, ನಿಮ್ಮ ಪ್ರಾರ್ಥನೆ ಮತ್ತು ನಿಮ್ಮ ಅಚಲ ಬೆಂಬಲ.
ಈ ವರ್ಷವನ್ನು ನಾವು ವಿಶೇಷವಾಗಿ ಜ್ಯೂಬಿಲಿ ಸಂವತ್ಸರ ವರ್ಷ 2025ವೆಂದು ಆಚರಿಸುತ್ತಿದ್ದೇವೆ. ಯೇಸು ಕ್ರಿಸ್ತರು 2025 ವರ್ಷಗಳ ಹಿಂದೆ ಈ ಲೋಕದಲ್ಲಿ ಹುಟ್ಟಿ ನಮ್ಮ ರಕ್ಷಕರಾದರು. ಆದ್ದರಿಂದ ಈ ವರ್ಷವನ್ನು ನಾವು ಪವಿತ್ರತೆಯಲ್ಲಿ (ಪರಿಶುದ್ಧತೆಯಲ್ಲಿ) ಬೆಳೆಯುವ, ದೇವರ ಕೃಪೆಯನ್ನು ಸ್ವೀಕರಿಸುವ, ಹಾಗೂ ಸಮಾಜಕ್ಕೆ ಕ್ರಿಸ್ತನ ಸಾಕ್ಷಿಯಾಗುವ ವರ್ಷವೆಂದು ಆಚರಿಸುತ್ತಿದ್ದೇವೆ. ಜ್ಯೂಬಿಲಿ ಎಂದರೆ ಕೃಪೆಯ ವರ್ಷ, ಆಧ್ಯಾತ್ಮಿಕ ಪುನರುಜ್ಜಿವನದ ವರ್ಷ. ಕಳೆದ ಮೂರು ವರ್ಷಗಳಿಂದ ನಾವು ಈ ಜುಬಿಲಿಗಾಗಿ ಸಜ್ಜುಗೊಂಡಿದ್ದೇವೆ: ಅಧ್ಯಯನದ ವರ್ಷ ವಾಟಿಕನ್ ಮಹಾಸಭೆಯ ಅಧಿಕೃತ ಪುಸ್ತಕವನ್ನು ಯೂಟ್ಯೂಬ್ ಮುಖಾಂತರ ಕಲಿಸಿದ್ದೇವೆ. ಪ್ರಾರ್ಥನೆಯ ವರ್ಷ – ದೇವರೊಂದಿಗೆ ಆಳವಾದ ಏಕತೆಯಲ್ಲಿ ಬದುಕುವ ಅಭ್ಯಾಸ. ಜ್ಯೂಬಿಲಿ ವರ್ಷ – ಕೃತಜ್ಞತೆ, ಹಬ್ಬ, ಮತ್ತು ಭವಿಷ್ಯದ ಹೊಸ ಬದ್ಧತೆಯ ಕಾಲ. ನಮ್ಮ ಧರ್ಮಕ್ಷೇತ್ರದಲ್ಲಿ ಮಹಿಳಾ ಜ್ಯೂಬಿಲಿ, ಕಿರು ಕ್ರೈಸ್ತ ಕುಟುಂಬದ ಜ್ಯೂಬಿಲಿ, ಕುಟುಂಬದ ಜ್ಯೂಬಿಲಿ, ಯುವಕರ ಜ್ಯೂಬಿಲಿ, ಸುವಾರ್ತೆ ಚಿಣ್ಣರ ಜ್ಯೂಬಿಲಿ, ಅಂತರ್ ಧರ್ಮೀಯ ಮತ್ತು ಅಂತ‌ರ್ ಪಂಗಡದ ಜ್ಯೂಬಿಲಿ ಆಚರಿಸಿದ್ದೇವೆ. ಇದರ ಉದ್ದೇಶ ಭರವಸೆಯಾಗಿರುವ ನಮ್ಮ ಶಿಲುಬೆಯನ್ನು ಪ್ರೀತಿ ವಿಶ್ವಾಸದಿಂದ ಅಪ್ಪಿಕೊಳ್ಳುವುದಾಗಿದೆ.

✠ ರಾಬರ್ಟ್ ಮಿರಾಂದಾ